TractorFansPortal.Com. ناصير حجازي بير خوش گؤرونوملو آدام ايدي و چوخلاري اونو سئورديلر. بيز ده اوشاقليقدا فوتبولو تانييار-تانيماز ناصير حيجازي‌ني تانييارديق. آنجاق اولابيلر اونون ائله بو "خوش تيپلي‌"گي اونو بير خالق سئون آدام ائله‌ميشدي. اونون تكجه ايكي-اوچ ايل چاليشماسي، آزربايجان‌دا اولوبدور، آنجاق من‌ده بئله بير دويغو وار ايدي كي او آزربايجانلي و تورك اويونچولارا تعصصوبلو بير داورانيش گؤسته‌رير و اونلاري تانيتديرماقدا آرتيق چاليشير.

او بو بير-ايكي ايل‌ده ايسه، مريضليگينه باخماياراق تبريزه چوخ گئت-گل ائتدي و حتي گؤستريش فولادين اوستون ليگه گئتمك يولوندا حاقسيز اولماغينا دا چوخ دا اعتراض ائتدي. دوز دور ناصير حيجازي اؤزو او كلوبون مشاوري ايدي، و اوغلو آتيلا دا اورادا مشقچي‌ليك ائديري، آنجاق اونون تعصب و غئيرتي اونون لاپ كئفسيز چاغلاريندا، اونون تايسيز بير آدام اولماغي‌ني اونايلاييردي. من اونون تورك اولدوغوندان تكجه بير ايلدي خبريم وار ايدي و يازيقلار اولسون عؤمرونون سونلاريندا بونو بيلديك. ناصير حيجازي‌نين تئهران‌دا بؤيومه‌يينه باخماياراق، آزربايجان ايچين آدديم آتماغي آزربايجان‌دا يئتيشيب آزربايجان دال چئويره‌نلره بؤيوك بير اؤرنك اولابيلر.

چوخ ماراقلي ايديم ناصير حيجازي‌نين آناديلينده دانيشماغي‌ني ائشيدم. كئشكي بير ويدئو يوخسا سس فايلي تاپابيله‌م. ايمكانسيز دير ناصير حيجازي ياشيندا كي تئهراندا بؤيويه‌نلرين آتا آنالاري تورك اولالار و اؤزلري توركجه بيلمه‌‌سينلر. البته چاغداش نسيللرده اولابيلر توركجه دانيشابيلمه‌يه‌لر، آنجاق يوز ده يوز توركجه‌ني باشادوشورلر. آنجاق بو گون "خبر ورزشي" گونده‌ليگينده حجازي‌نين ديليندن، "من و قارداشيمين آراسيندا فرق قويوردولار" باشليقلي يازي‌ني گؤردوم:

آتام تبريز اوشاغي، و آنام‌دا خرمدره-ابهر يانينداكي كندلريندن ايدي. اؤزوم ده تئهران‌دا آنادان اولموشام؛ آنجاق توركجه دانيشابيلميرم. هر نه، حتي لاپ چتين توركجه سؤزجوكلر و جومله‌لر دئسه‌لر باشا دوشه‌رم، آما توركجه دانيشابيلميرم. چون بيزيم عاييله‌ده آتا و آنام هامي ايله مندن سونرا توركجه دانيشيرديلار. البته بونون نه‌ده‌نين بيلميرم، آنجاق اولابيلر ائله‌بيليرديلر توركجه اؤيره‌نمك من ايچين چتين‌دير و من دانيشابيلمه‌يه‌م!

خبر ورزشي گونده‌ليگي‌ بوندان اؤنجه ده، تيراختور و توركلر حاققيندا، دوزگون سؤز يايماماق سابيقه‌سي وار و اولابيلر ناصير حيجازي‌نين بو سؤزلري باشقا جوره دئييب. بيلديگيميز كيمي ناصير حيجازي اؤزو خارجي ديل و ديلماجليق تحصيلي ائديبدير. ايندي ائله بير آدام نئجه اؤز آناديلينده دانيشابيلمه‌ييرميش چوخ عجيب‌دير. خبر ورزشي‌ يايميش يازي‌دا، حيجازي او سؤزلرين آرديندا دئييب كي:

"اولابيلر آتام ايسته‌ييرميش اؤزوم چاليشام، و اؤز آياقلاريمين اوستونده دورام".

ناصير حيجازي‌نين بو سؤزلري دوغرو و گرچك اولسالاردا، منجه بو يازيلارين توركلري به‌يه‌نمه‌يه‌ن بير درگي‌ده ياييلماغيندا، ناصير حيجازي‌ كيمي يئته‌نكلي آداملارين تايسيز باشاريلار و زيروه‌‌يه چيخماقلاري‌نين اساس يولو، "اؤز كيمليكلريندن اوزاق ساخلانيلمالاري" تبليغ اولونور! اؤرنك ايچين ناصير حيجازي‌نين قارداشي‌ ايله توركجه دانيشيرميشلار آما ناصيرين اؤزو ايله يوخ! ناصيرين دئمك ازديريلميش قارداشي و توركجه اؤيره‌نميش قارداشي آدليم اولماييب، آنجاق ناصير هن! البته بو آرادا بير پارادوكس‌دا واردير، و او آتانين اؤز سئوگيلي اوشاغي‌ ايله توركجه دانيشماغي دير.

يازي‌نين سونوندا، آزربايجانين پارلاق اولدوزو، ناصير حيجازي‌نين دونيايا گوز يومماسي‌‌ني، باش ساغليغي دئييرم.

آیدین کسائی