TractorFansPortal.Com. ايسته‌ميرم 10جو ليگين سونوندا، تيراختورون باشينا گه‌لن اويونلاري آچيقلايام. چونكو هامي بيلير. فيكر ائله‌ميرم بيري‌سي اولا دئيه‌ تيراختورون قارشي‌سينا داش آتيلمادي؛ سون آدديملاردا تيراختور ته‌كه‌رلري‌ پنچر اولمادي؛ سون آدديملاردا تيراختورون سوروجوسو آياغين قازدان گؤتورمه‌‌ييب هئچ، و يانداشلارين گوجله ايته‌له‌مه‌يينه باخمادان، تورموزا باسمادي! و ...

تاماشاچيلارين سون اويونداكي "عئيبي يوخ" دئمك يئرينه، ديله گليب آجيقلانمالاري، بيلديردي كه يانداشلار بوندان بئله سارييان آداملارين قارشي‌سيندا سوسماييب، و آچيقجا سؤزلري‌ني دئييب اوياري(هشدار) وئره‌جكلر.

آنجاق بير سايي درس آلماييبلار سانكي. گلين گؤرك بو گونلر تيراختورو ياخيندان و اوزاقدان دولانديرانلار، و تيراختوردا اويناييب اوينادانلار، ليگ قورتاراندان سونرا نه ايشلره باخيرلار. گؤرك تيراختورون ميليونلار يانداشي‌نين ايستكلري، بيري‌سي‌نين وئجينه دير، يوخسا يوخ:

فئدراسيون سوروملولاري(مسؤوللاري):

تيراختور ايكينجي ايل ايچين ده، تاماشاچي سايي‌سي‌ رئكوردونو الينده ساخلادي. دئمك AFC نين ايران فوتبولونا سهميه وئرمك عاميلينده كي اساس گؤره‌و تيراختور بوينوندا ايدي. بو قالسين كي تيراختورون اؤزو بو سهميه‌لردن اوزاق ساخلانيلير! آنجاق فئدراسيون سوروملولاري او يان – بو ياندا اوتوروب، شيشه-شيشه تاماشاچي سايي‌سي‌نين آرتماسيندان دانيشيب، آنجاق تيراختورو قصد ايله اونوتماقلاري، بيزلره دانيشمادان حيسابا قويماماق آنلاميندادير. سيزي سايميريق قالاسيز يانا يانا!

اوستان سوروملولاري:

اوستاندار تربيت بدني سوروملولارينا گؤسته‌رديگي استراتژيك هدفلر آراسيندا "قهرمانليق ايدمان (ورزش قهرماني)" بيرينجي سيرادا يئر آلير، و فوتبول حاقيندا دا دئييلير بئله باشاريلار(تيراختورون بئشينجي اولماغي!) اؤزگه اويونچولارين الي ايله ياپيشمير! اونون سؤزلري ظاهيرده گؤزل اولسالاردا، آنجاق آزربايجانليلارين بوگونكو ماراقلارينين قارشي‌‌سيندا دير! تيراختورو آلقيشلاماق و تيراختورو آسيايا چاتديرماق، بوتون آزربايجانليلارين بيرينجي هدفي اولسادا، آنجاق يانداش‌سيز ايدمانلاردا قهرمان اولماق ده‌يه‌رلنديريلير! و باشقا طرفدن  "بومي(يئرلي)" اويونچولارلا باشاري قازانماغين اؤنملي اولدوغونا بارماق قويماق، "كرار" كيمي اويونچولارين سئويلمه‌ييني ائتكيلنديرمك آنلاميندا اولابيلر. بو بير گرچك‌دير كي بوتون آزربايجانلي‌لار، كرار جاسيمين استقلال و پيروزي‌يه ووردوغو قول‌لاريندان، تائكواندو دا دونياليق ميدال قازانماقدان چوخ سئوينديلر. البته بيزيم ده آللاهميزدان‌دير "كريم انصاري‌فرد" كيمي تورك اويونچولار تيراختوردا اويناسينلار؛ فارسلار دئميش، اين گوي و اين ميدان! گئدين كريم انصاري‌فردي گتيرين تيراختورون باشاريلاري لاپ ياپيشسين. ولي اولابيلر، دئييلسين كريم بيزيم "استان"دان(ustan يوخ، ostan اوخويون) دئييل، يوخسا گتيررديك!!

بونو قبول ائتمه‌لي‌ييك، تيراختورون موتورو قيزيشيب سينيرلاري آشان زامان، "تورك" اويونچو يادينا دوشمك گولمه‌لي‌دير! اتفاقا ايندي تيراختورون تورك، يوخسا اؤزگه اويونچولارلا، تايسيز باشاريلاري، آزربايجاندا فوتبول هيجاني يولا ساليب اوچ – دؤرد ايلدن سونرا چوخلو يئته‌نكلي(استعدادلي) آزربايجانلي اويونچولاري مئيدانا چكه‌جك‌دير.

هر حال‌دا دئديگيميز هدفلري بؤيودوب اورتا قويماقلاري، دوز اويونچولارين نقل و انتقالات زاماني تيراختوردان ياخشي اويونچولاري قاچيرتماقدان سونرا باشقا آنلامي يوخدور.

جعفري:

آسيا فوتبول كـونفئدراسيونوندان، تبريزه ده، باش چكديلر. بو دا قالسين كي ايستاديوما بير آز يئتيشسه‌لر كونفئدراسيونون اخطارلارينا گؤره دير، تاماشاچيلار آلا گؤزلرينه گؤره يوخ، گؤرك جعفري سهند تيلويزيونوندا AFC نين، باش چكمه‌سينه گؤره نه دئدي! سؤزسوز سوزوكي(AFC مميزلري‌نين باشچي‌سي)‌يه ده تاماشاچيلاردان مايا قويولوبدور. اصلن تيراختورا گؤره، تاماشاچي‌دان سونرا نه دئمك اولار كي؟! ايستاديومون اطرافينداكي توز-تورپاغي كي گؤسته‌رمه‌يه‌جكلر!!؟ آنجاق جعفري جنابلاري‌دا اؤز "مديريتي" قدرتي‌ني اثبات ائتمك فيكرينده ايدي و دئدي سوزوكي دئدي تيراختورون مديريتي چوخ قوي دير! بو دا قالسين كي AFC نين وئرديگي ريپورت‌دا، تيراختور Club ، Stadia و Others عاميللرينده، ياني هر اوچ فاكتوردا ضعيف نومره‌لر آليب! دئمك بو مديريتين نه‌يي تحسينه لاييق گؤرونوب بللي دئييل. و آللاه بيلير تيراختورو دولانديرانلار اوركدن ايسته‌ييرلر تيراختور بير گرچك "كلوب" اولسون، يوخسا يوخ؟

كمالوند:

كمالوندين ايشلري ايسه، اولوب بير تيكراري سئريال. منجه او تئكنيك و كووچ ائتمك باجاريغي باخيميندان يوخ، بلكي، داورانيشلارينا گؤره تيراختوردان گئتمه‌لي‌دير. آدامين اوره‌گيندن گلمير اونا چيخ گئت دئسين. آما او دقيقه باشي شرط شرايط قويماسي و بئله اولماسا ائله ائده‌جه‌يم، آنجاق ترسينه ايش گؤرمه‌لري ايله، "يولون آچيق اولسون" دئمه‌يه تحريك ائدير. كمالوند اه‌يري اوتوروب دوز دانيشسين؛ اونو هانكي جدول باشينداكي تيملر ايسته‌يه‌رلر؟! او سون اويونلارداكي اودوزمالاري سالدي اويونچولار بوينونا. حالبوكي بو اويونچولاري او ييغيب و تاپيب گتيريب. او دا بو آرادا اؤزونه بازار آچيب دئيه‌سن!

نصرتي:

نصرتي تاماشاچيلارا يامان دئمه‌يينه گؤره عوذر ايسته‌دي. آنجاق سون دقيقه‌ده قول وورماغي‌ايله ثبوت ائتدي كي تاماشاچي هردن اونا عئيبي وار دئمه‌لي‌دير. نصرتي دئييب ايستيرم تيراختوردا قالام، آنجاق تيراختورو قهرمانليغا باشاران اويونچولار آلينماسالار، من‌ده قالماياجاغام. نصرتي ساغ اولسون يانداشلارين ايسته‌ييندن دانيشير، آنجاق اؤز سؤزو ايله بيزي بير داها شوبه‌لنديرير! اولمايا سايپا اويونوندا دا ائله بيليرميشسن تيراختورون سن‌دن سونرا هوشلو-باشلي اويونچوسو يوخدور و بونا گؤره ياخشي چاليشميردين و يانداشلارين سني اوياتماقلاري سنين آمپئريني قالديردي؟! بئله اولورسا تكجه سن و يانداشلارين بيرلشمه‌لري تيراختورو قهرمان ائده‌بيلر. بونو بيلسه‌يديك سيپاهان اويونوندا دا سنه شوك وئره‌رديك!

آندرانيك:

اينگليس‌دن ديپورت اولموش اويونچو، ايرانا گلندن سونرا ايكي قيرانليغي ياخشي دوشموشدو كي بير اونودولموش اويونچو اؤز آدي‌ني نئجه ديللره سالا بيلر. البته آندرانيكين سون اويونلاردا مصدوم اولوب اولماماغي بير آز شوبهه‌لي اولماغينا باخماياراق، دئمك اولار آندرانيكين اويناييب-اويناماماغي تيراختوروچون حياتي دئييلدي. دئييلير آندرانيك ايسته‌يير استقلالا گئتسين. بيز اونا ساغ اول دئييب آللاهين آمانينا تاپشيرماقدان قاباق بير باشقا سؤز دئمه‌لي‌ييك. او دئييب كي من ايچين آسيا دا اويناماق اؤنملي‌ اولدوغو ايچين، استقلالا گئديرم. بيز اونا دئمه‌لي‌ييك: اتفاقا بيز ايچين ده آسيا يا گئتمه‌يين اؤنملي اولدوغو ايچين، سن خوش گئده‌بيلرسن. دوغرودان نه خبر پريمايئر ليگدن؟!

آندرانيكه بيري‌سي بو خبري وئرسين كي دئييرلر "مهرداد پولادي" ايسته‌يير تيراختورا قاييتسين. دقيق بيلميرم پولادي، ميس‌ده ايسه ياخشي اويناييب يوخسا يوخ؛ آنجاق بونو بيليرم كي تيراختوردا اولدوغو كيمي، اوتوز-قيرخ مئتيرليكدن ووردوغو قوللاردان، هئچ بير دنه‌ده وورا بيلمه‌دي! تيراختوردا پارلاماق ايله، اولابيلر بير اويونوچو آدلانيب و باهالاشسين، آنجاق هئچ تضمين يوخدور، تايسيز آلقيشلار اولمادان، بير داها اويونچولار پارلاسينلار. بو سؤزو باشقا اويونچولارا دا دئمك اولار.

اسدي و باشقا اويونچولار:

"اسدي" و بير نئچه باشقا اويونچو بونا گؤره راحاتسيزديلار كي، نه‌دن تمديد ايچين، تله‌سيب دانيشماييرلار. اسدي دئيير من سوناجاق دؤزه‌بيلمه‌رم. آنجاق اسدي‌ني اوركدن ايسته‌ديگيميزه گؤره، اونولا ايتي دانيشماق دوز ايش دئييل. تكجه اوندان ايسته‌ييريك يانداشلارا گؤره صبريني چوخالتسين. مهرداد پولادي اؤرنه‌ييني، بونلارا دا وئرمك اولار.

---

سون:

كئچن ايلين ياي سونوندا "تيراختور يانداشلاري‌نين ده‌يه‌ري"* باشليق‌لي بير يازي‌دا، عدد و رقم ايله دئديك يانداش ده‌يه‌ري تاخيمدان چوخدور. آنجاق گؤروروك بو گونلر بير سايي، اساس ياتيريم(سرمايه اصلي) نظرينه سايقي گؤسترمه‌دن، اؤز فيكرلرينده‌دير. حالبوكي تاپديغي ده‌يه‌رلري، اونودوتدوقلاري يانداشلاردان آليبلار. بو اولاي‌لارين بير بؤلومو، بير حدده طبيعي‌دير؛ آنجاق تيراختور يانداشلاريني موطلق اونوتماق يانليش دير.

و تكجه بيز ساتيلمالي دئييليك سانكي. يوخسا بيزده اؤزوموزه بازار آچارديق؛ يانداش بازاري!

و البته كي بو ايش اولان دئيل و نه‌دني ايسه، چوخ ساده‌‌دير: تيراختورو آلقيشلاماق كيمليگيميزي سئومك‌دن آسيلي‌دير، و كيمليگي‌ده بازارليق ائديب، آليب-وئرمك اولماز.

ياشاسين تيراختور يانداشلاري

ياشاسين آزربايجان

آيدين كسائي

ياز سونو (خرداد) / 1390

* - تيراختور يانداشلاري‌نين ده‌يه‌ري

http://www.azarbaijansport.com/index.php?option=com_content&view=article&id=1300:%D8%AA%D9%8A%D8%B1%D8%A7%D8%AE%D8%AA%D9%88%D8%B1-%D9%8A%D8%A7%D9%86%D8%AF%D8%A7%D8%B4%D9%84%D8%A7%D8%B1%D9%8A%E2%80%8C%D9%86%D9%8A%D9%86-%D8%AF%D9%87%E2%80%8C%D9%8A%D9%87%E2%80%8C%D8%B1%D9%8A&catid=39:%D9%85%D9%82%D8%A7%D9%84%D8%A7%D8%AA&Itemid=58