Tiraxturfans.Com. گئچن هفته مديالار كريمين ديليندن اونون تراختورا گلمه سيندن يازديلار. سونرا جعفري تكذيب ائله دي. كريم قيزيب دئدي: بئله ايسه هئچ منده گلميرم، خئيريندن گئچديم. و دوغورداندا گئچدي، البته چوخدان گئچميشدي!

اما اولايلار بوردا قوتارمادي. چوخ دوغال ايدي تراختورون يانداشلاري بو اولايا تئپكي گؤرسه دلر. يانداشلارين نظرلري فرقلي ايدي. بعضي گلمه سين دئديلر و بعضي لري ده آي هوار داها كريم-ي اوچورتمايين. قونوبسا تراختورا قويون توتاق دئديلر. اما دوغوردان قضيه نه دي؟ بو مسئله ني آيدينلاتماق ايچين بعضي اولايلار و پرده آرخاسيندا اولان آماجلاري بيرليكده  مرور ائتمه گيميز لازيم دير.

منجه آذربايجان كريمه و حتي داييه گئچن ايكي ايلده حددن آرتيق مايا قويدو. تبريزده محتشم قاريشلانمالاري و تهراندا تايسيز آلقيشلانمالاري بو سوزلره بويوك سندديلر. ائله آذربايجان اوغوللارين باغرينا باسدي كي دايي ني جو توتوب "كئشكه گنج اولسايديم و مئيدانا گيريب اويناسايديم" دئدي.

اونلار (مانقورتلار) نئيله ديلر؟

فرصت تاپيب تاپمادان اوزلرين تهرانا و پرسپوليسه باغلي اولدوقلارين وورغولويوب آنلاتديلار. تهراندا پرسپوليس تراختور اويونوندا، او چيركين يامانلارا گؤز يومدولار و آذربايجان ميللتيه اولان توهينلري گؤرمه دن گلديلر و حياسيزجاسينا پرسپوليس يانداشلارين ان كولتورلو يانداشلار آنلاتديلار. من آنجاق پس پس سئوگيسي ايله ياشيرام و فوتباليما بو تيمده سون وئره جم و ...

سونرالار ايسه تراختورچولارا متوهم دئديلر، آذربايجان مال ايران (نه جرئي از ايران!!) است دئديلر و ...

يولداشلار بونلاردان فاطي يه تومان اولماز. بونلار تهراني آتا بيلمزلر. هله 60 جي ايللرده ياشيرلار. آذربايجاندا نه دييشيكليك لر اولدوقوندان خبري يوخ يا ايستميرلر بيله لر. اونلار "وطن پرست" آدلانماق ايچين هر گون گئديب ساتقينليق كارتي چئكيرلر. و دونه دونه اوز ساتقينليقلارينا تاكيد ائليرلر و البته داها آرتيق وطن پرست اولماق ايچين دوغولوب بويودوكلري يوردا و اونون ميلليته سايقيسيزليق ائديرلر.

نيه كريم تراختورا گلير اما دايي يوخ؟

كريم بير بئسواد آدامدير. فني مباحيثدن ده هئچ باش آچماز. ديري آنجاق تجربه لريدي كي گئچميش و سنتي فوتبالا عاييددير. اونون فوتبال ساوادي اولماديقينا گؤره چوخ دوغالدير حذف اولا. اينانين يولداشلار ايكي ايلدن سونرا او بوتونلوكله فوتبالدان حذف اولاجاق. نئجه كي مجتبي محرمي كيمي بويوك اويونچولارين حذف اولدو و فوتبالدا يئرلري يوخ. نيه كي باشاراتي فقط اويناماقيدي. كريمده محرمي دن و اونا تاي چوخ اويونچولاردان آرتيق دئييل. كريم بونو هاميدان ياخچي بيلير. او فوتبالدان حذف اولونماسين گئچن ايل دريندن آنلاييب بوتون وجود ايله درك ائله دي. بلكه اينانميردي بو قدر تئز حذف اولاجاقين. او يئني دن قاييتماق ايستير. ايستير يئني دن آدي و شكيلي قزئت لرين اون صفحه سينده اولسون. ايسته مير حذف اولسون. قزئتلردن حذف اولماق اونون اؤلمه سيندن آغير اولاجاق. ياني او ديري ديري اؤله جك و بو ان آغير عذابلارداندي!

او ايرانين ميللي تيمينه گئددي. اما ائشيگه آتيلدي. پس پسه قاييتماق ايسته دي اما اوز گؤرمه دي. او بيري تيملرده اونا احتياجلاري يوخ. نيه كي اونون بو زمينه ده ياراري. ايسته سه لرده كريمه يارار اولموياجاق. كريم بير تيم ايستير يانداشي اولا. ايستير اونلارين طريقي ايله هر گون ديل لرده اولا.  طبيعي دي استقلالا گئده بيلمز. گئدرسه هر زادين الدن وئرر. قالير تراختور. قاباقجا اوردا اوينويوب. كؤينگي قيرميزي دير. يانداشلاري بير زامانلار اونو بتر چوخ ايسترديلر.  و ان اونملي سي بودور كي يئني دن اوركلره قاييدار و اوزونه بير رزومه دوزلديب و علي دايي دئميشكن پرسپوليس اصلي صاحابلارينا قاييدان زامان اوز ائوينه (پرسپوليسه) دؤنر. منجه او ان دوز سئچه نگي سئچيب و دوز هدفه ووروب.

بيز نئيله مه ليييگ؟

ايندي سيرا بيزيمدير. كريمين تراختور حاققيندا حاق سيزليقلاري، حورمتسيزليقلاري لاپ لاپ آيديندي. او پرسپوليسه گؤره تراختوردان و هابئله آذربايجانددان گئچدي. منجه كريم باغيشلانسا بيزلر اؤزومو و آذربايجاني كيچيلديب غرورموزو سينديميشيق. بيز بو ايش ايله گله جك ساتقينليقلارا يول آچيريق. بيز بو ايش ايله خطيبي لره كي تراختور و آذربايجانا حورمت قائلديلر و آذربايجان سئوگيسي ايله ياشيرلار حورمت سيزليگ ائليريك. بيز بو ايش ايله آذربايجانا اولاجاق خيانتلره يول آچيريق. كريم باغيشلانسا داها هئچ كس دن اينظاريميز اولا بيلمز آذربايجانا و اونون ميللتيه حورمت قويالار.

ايشلريندن پئشمان اولان آذربايجانليلار باغيشلانا بيلينر مي؟

البت باغيشلانا بيلرلر. اما هر شئي دن قاباق گرگ او كئچميشلريندن پئشمان اولوب اوندان اظهار ندامت ائلي يه لر. آذربايجان و اونون ميلليتي نين قاباقيندا ديز چؤكوب عذر ايستيه لر. منجه كريم واقعا پئشمان اولسا (كي اصلا دئييل) بو تئزليكده اونون گناه لاريندان گئچيب و اونو باغيشلاماق اولماز. دوستلار بير آز دؤزوملو اولماليييق. قويون اونجه كريم قارداش ليقين بيزه ثابيت ائله سين سونرا اونون باغيشلانماقين باره سينده اوتوروب دانيشاق.

منجه كريم هله تهرانا باغليدي. او ايستير تراختورو ترقي پيلله سي كيمي قوللانا. ايستير اوزون گؤرسه ده سونرا قاييدا پس پسه. نيه كي اونون اؤرگي اوردا. نيه اونون اوشاقلاري فارسجا دانيشللار. نيه كي ائوينده پرسپوليس ستون لاري نين تابلولاري آسيليب و آذربايجان هويتين گؤرسه دن  بير اثردن  نيشان يوخدور. اونون اوشاقلارلاري داريوش كوروش سئوگيسي ايله بويورلر نه بابك كيمي ار ايگيد سئوگيسي ايله. دوستلار كريمدن توركلوكدن قالان آنجاق بير شئي دير. اودا اونون لهجه سي دير.

اصوللو اولوب، قوراللار اساسيندا تصميم توتمالي ييق!

يولداشلار گلين بير آز دوزوملو اولاق. هم بيرينه قيزيب طرد ائله مك زامان، همده بيرين باغيشلاماق دا.  بيزيم احساسي اولدوقوموز گئچن ايل نصرتي و نئچه بير آيري اسكيك اويونچولار تراختورا و آذربايجان ميللتينه اهانت ائله سينه يول وئردي. تراختورون كؤينگين جيريب يئره آتماقا يول آچدي. او اويونچولارين بعضي لري هله ده تيمده قاليرلار. ديلداشلاريم بيزيم گرك قضاوتلريميز ايچين بعضي اصوللاريميز اولسون و اونلارين اساسيندا هر زاد قضاوت اولسون. اونون اساسيندا ياخشي پيسدن آييرد اولسون. نه بو كي احساس و شخص اساسيندا اولسون. بئله اولمويا كي كريم كيمي آداملار زامانيندا هر نه توهين اوركلري ايسته سه ائله سينلر سونرادا دئيه سن هئچ بير شئي اولمويوب كيمي گلسينلر ايشه باشلاسينلار. ائله بو شخصيت باعيث اولدو بعضي اويونچولار جسارت لنه لر. ايصفاهان گئديب اولمويان سوگوش لري يئييب و ائشيديلميين توهين لري ائشيديب سونرا گليب تبريزده اونلاري باغريميزا باسيب ياشاسين سپاهان دئيه ك. بئله اولماز. آذربايجان ميللتينه توهين ائلي ين بو تئزليگه باغيشلانا بيلمز. بو بيزيم ان بويوك ضعف نقطه لريميزدن دير كي تاريخ بويو اوندان درس آلماميشيق و هر زامان شفقت ايله داوارانيب پيسليك لري و يامانليقلاري تئز اونودموشوق. نئچه مين لر شهيد وئريب مشروطه ياراتديق سرداريميز گولله ديلر. فيرقه زامانيندا 80 مين وطنداشيميز اولدورن فارسا قارداش اولوب 28 بهمن ياراتديق. ديليميزه كولتوروموزه اهانت ائدنلرين تورپاقين قوروماقا اون مينلر شهيد وئرديك. اما نه اولدو؟ اونلار هله ده بيزه ائششك دئييرلر. و بونون او زامانا دك كي سنينله منيم تصميملريميز اوصول استونده يوخ احساس اساسيندادير داوامي اولاجاق! سؤز كريمين گليب گلمه سينده دئييل.

تيليم